مسلم لیگ ق کے رہنما پرویز الہٰی نے  وزیر اعلیٰ پنجاب کے عہدے کا حلف اٹھالیا۔ گورنر پنجاب کی جانب سے حلف لینے سے انکار کے بعد صدر مملکت عارف علوی نے چوہدری پرویز الٰہی سے حلف لیا۔

President Dr Arif Alvi administering oath to Chaudhary Pervaiz Elahi as Chief Minister Punjab, at Aiwan-e-Sadr, Islamabad on July 27, 2022. pic.twitter.com/E8b9IRLCSm

— The President of Pakistan (@PresOfPakistan) July 26, 2022

تقریب حلف برداری ایوان صدر میں ہوئی جس میں مونس الہیٰ، چوہدری وجاہت حسین، موسی الہیٰ، میاں محمود الرشید، زین قریشی، ڈاکٹر مراد راس، یاسمین راشد ، سینیٹر وسیم سجاد سمیت دیگر افراد نے شرکت کی۔

واضح رہے کہ چوہدری پرویز الہٰی سپریم کورٹ کے حکم پر وزیر اعلیٰ پنجاب کا حلف اٹھانے جب گورنر ہاؤس پہنچے تو اس کے گیٹ بند ملے ۔ پرویز الہٰی کو داخلے کی اجازت نہیں ملی ۔گورنر پنجاب بلیغ الرحمان نے چوہدری پرویزالٰہی سے وزارت اعلیٰ کے عہدے کا حلف لینے سے معذرت کر لی تھی ۔ چوہدری پرویز الٰہی حلف برداری کے لیے خصوصی طیارے کے ذریعے لاہور سے اسلام آباد پہنچے ۔ گورنر پنجاب بلیغ الرحمان کے انکار کے بعد چوہدری پرویز الہیٰ حلف برداری کیلیے خصوصی طیارے سے اسلام آباد پہنچے جہاں اُن کا مونس الہیٰ نے استقبال کیا۔

خیال رہے کہ سپریم کورٹ نے ڈپٹی اسپیکر رولنگ کیس میں پرویز الٰہی کی درخواست منظور کرتے ہوئے پنجاب اسمبلی کے ڈپٹی اسپیکر دوست مزاری کی رولنگ کالعدم قرار دے دی تھی۔

چوہدری مونس الہی نے ٹوئٹ کیا کہ اللہ پاک کے فضل سے ایک مشن پورا ہو گیا ، اب دوسرے مشن کے لیے تن من دھن کی بازی لگائیں گے اور عمران خان کو وزیراعظم کی کرسی پر واپس لے کر آئیں گے ۔

اللہ پاک کے فضل سے ایک مشن پورا ہو گیا اب دوسرے مشن کے لیے تن من دھن کی بازی لگائیں گے اور انشاءاللہ PM @ImranKhanPTI کو واپس اپنی کرسی پہ لے کر آئیں گے۔ pic.twitter.com/reK5UJ5LmC

— Moonis Elahi (@MoonisElahi6) July 27, 2022

دوسری جانب ملک کے سب سے بڑے صوبے کے وزیراعلیٰ چوہدری پرویزالٰہی کی تقریب حلف برداری سرکاری ٹی وی پر نشر نہیں کی گئی ۔ سابق وزیر اطلاعات فواد چوہدری نے اس پر تبصرہ کرتے ہوئے کہا کہ مریم اورنگزیب کے کہنے پر پرویز الہٰی کی تقریب حلف برداری نہیں دکھائی گئی۔

فواد چوہدری نے تنبیہہ کی کہ میں بتا رہا ہوں کہ پی ٹی وی پر جو لوگ اس وقت عہدوں پر ہیں اگلے مہینے نہیں ہوں گے، اگر ان لوگوں کو بھی جیل میں جانا ہے تو ایسا کرتے رہیں، مریم اورنگزیب خود جیل جانے والی ہیں۔