اسلام آباد ہائیکورٹ نے وزیرٹرانسپورٹ خیبرپختونخوا شاہ محمد اور وفاقی وزیرعلی امین گنڈا پورکے بھائی عمر امین گنڈا پور کی نااہلی ختم کردی، عدالت نے الیکشن کمیشن کے فیصلے کوکالعدم قرار دے دیا۔۔

چیف جسٹس اطہرمن اللہ نے مختصر فیصلہ جاری کیا،عدالتی فیصلے کے مطابق بکا خیل سے پی ٹی آئی امیدوار مامون الرشید کی نااہلی برقرار رہے گی۔

چیف جسٹس نے ریمارکس دیئے کہ کہ اتنی خلاف ورزی کہ ایک وزیر بیلٹ باکس ہی اٹھا کر لے جائے، جب اتنی سنگین خلاف ورزی ہوگی تو پھر تو پوری سیاسی جماعت ذمہ دار ہوگی، بیلٹ باکس اٹھانے کے الزامات معمولی نہیں ہیں۔
شاہ محمد کے وکیل نے موقف اپنایا کہ کہا کہ یہ مخالف امیدوار کی جانب سے الزامات لگائے گئے ہیں جن میں سچائی نہیں،چیف جسٹس نے استفسار کیا کہ کیا آپ کے موکل ان کا نام لیتے ہیں؟ وکیل نے جواب دیا کہ وہ بھی ان کا نام نہیں لے رہے۔

درخواست گزار کے وکیل نے دلائل دیئے کہ یہ معاملہ بیلٹ بکس اٹھانے کے علاوہ دیگر الزمات کا بھی ہے ،اسسٹنٹ پریذائیڈنگ افسر نے اپنی جگہ محبت خان نامی شخص کو بٹھا دیا اور کہا کہ آدھے پیسے آپ لے لینا،محبت خان کے خلاف کرپٹ پریکٹس کی کارروائی ہونی جائے۔

چیف جسٹس اسلام آباد ہائی کورٹ نے ریمارکس دیئے کہ الیکشن کمیشن کا آرڈر دکھا دیں کہ وہ اس بارے میں کیا کہتا ہے؟یہ اپیل نہیں ہے، بتا دیں کہ یہ عدالت رٹ کے دائرہ اختیار میں کس حد تک جا سکتی ہے؟بیلٹ باکس اٹھانے کے الزامات معمولی نہیں ہیں۔

دوسری جانب پی ٹی آئی کے عمر امین گنڈا پور کے کیس میں چیف جسٹس اسلام آباد اطہرمن اللہ نے ریمارکس دیئے کہ الیکشن کمیشن کو پہلے جرمانہ اور بعد ازاں نااہل کرنا چاہیے تھا،یہ جرمانے والا معاملہ سکپ کیوں ہوا۔