آرمی چیف جنرل قمر جاوید باجوہ کو متحدہ عرب امارات نے ’’آرڈر آف دی یونین ‘‘کے اعزاز سے نوازا ہے۔ متحدہ عرب امارات کے صدر شیخ محمد بن زاید النہیان نے آرمی چیف جنرل قمر جاوید باجوہ کو آرڈر آف دی یونین میڈل پیش کیا۔آرڈر آف دی یونین ،یو اے ای کا دوست ممالک کے اعلیٰ حکام کو دیا جانے والا دوسرا بڑا اعزاز ہے ۔آرمی چیف کو یہ ایوارڈ یو اے ای اور پاکستان کے تعلقات مضبوط بنانے میں نمایاں کردار پر دیا گیا۔
متحدہ عرب امارات کی جانب سے یہ ایوارڈ شہزادہ سلمان بن حماد ال خلیفہ ، پرنس فلپس اور پرنس ولیمزکو دیا جا چکا ہے۔ ایمل لاھود ،بل گیٹس اور سرگئی لاوروف کو بھی آرڈر آف دی یونین سے نوازا جا چکا ہے
#COAS called on H.H Sheikh Mohamed Bin Zayed Al Nahyan, President of UAE. Matters of mutual interest, bilateral defence & security cooperation and regional security situation discussed. The leaders agreed that Pakistan and UAE share a great history of cordial relations (1/2) pic.twitter.com/A1U8nXyhtS
— DG ISPR (@OfficialDGISPR) August 17, 2022
ڈی جی آئی ایس پی آر کے مطابق آرمی چیف جنرل قمر جاوید باجوہ متحدہ عرب امارات کے سرکاری دورے پر ہیں ۔اماراتی صدر نے جنرل قمرجاوید باجوہ کا ابو ظہبی کے شاہی محل قصر البحر پہنچنے پر استقبال کیا۔
ڈی جی آئی ایس پی آر کے مطابق آرمی چیف نے متحدہ عرب امارات کے صدر شیخ محمد بن زید النہیان سے ملاقات ہوئی۔ جس میں باہمی دلچسپی کے امور، دوطرفہ دفاعی اور سیکیورٹی تعاون کے علاؤہ مشرق وسطیٰ میں علاقائی سلامتی کی صورتحال پر تبادلہ خیال کیا گیا۔
امارتی صدر شیخ محمد زاید النہیان کی جانب سے متحدہ عرب امارات اور پاکستان کے درمیان دیرینہ تعلقات اور انہیں مختلف سطحوں پر مستحکم کرنے کے لیے باہمی دلچسپی کا اعادہ بھی کیا گیا۔
ملاقات کے دوران آرمی چیف جنرل قمر جاوید باجوہ نے امارات کے صدر سے گفتگو کرتے ہوئے ایوارڈ سے نوازنے پر شکریہ ادا کیا۔جنرل قمر جاوید باجوہ نے کہا کہ یہ اعزاز دونوں ممالک کے مابین دوستانہ تعلقات کی مضبوطی کا عکاس ہے۔دونوں ملکوں کو جوڑنے والے دوستانہ تعلقات مستحکم ہیں۔انہوں نے کہا کہ پاکستان امارات کے ساتھ مفید تعاون کے فروغ اور دونوں ملکوں کے عوام کے مفاد کے لیے باہمی تعاون کو مزید بلندی تک لے جانے کی خواہش رکھتا ہے۔
اس موقع پر شیخ محمد بن زاید آل نہیان نے کہا کہ امارات اور پاکستان کو گہرے تاریخی رشتے ایک دوسرے سے جوڑے ہوئے ہیں۔ مختلف سطحوں پر دوطرفہ تعلقات کو مستحکم بنائے رکھنے کی مشترکہ خواہش باہمی رشتوں کے استحکام کا باعث ہے۔جنرل باجوہ نے دونوں ملکوں کے دوست عوام کے مفاد میں مشترکہ جدوجہد اور تعاون کی جہتوں کوعروج کی نئی منزلوں تک پہنچایا ہے۔
اس موقع پر مجلس قصر البحر میں ریاست العین حکمراں کے نمائندے شیخ طحنون بن محمد آل نہیان، شیخ سیف آل نہیان، شیخ سرورآل نہیان، ریاست ابوظبی ایگزیکٹو کونسل کے سربراہ شیخ ھزاع بن زاید آل نہیان، زاید بن سلطان آل نہیان فاؤنڈیشن کے چیئرمین شیخ نہیان بن زاید آل نہیان، نائب وزیراعظم شیخ منصور بن زاید آل نہیان، صدارتی مشیر شیخ ڈاکٹر سلطان آل نہیان، ریاست ابوظبی آفس کے سربراہ اور ایگزیکٹیو کونسل کے رکن شیخ خالد آل نہیان، شیخ حمدان بن محمد آل نہیان، شیخ زاید بن محمد آل نہیان اور وزیررواداری و پرامن بقائے باہم شیخ نہیان بن مبارک آل نہیان بھی موجود تھے۔
#UAEPresident presents Order of the Union to Chief of the Army Staff of #Pakistan #WamVideo pic.twitter.com/KxWAYcrNfa
— WAM English (@WAMNEWS_ENG) August 16, 2022
واضح رہے کہ آرمی چیف جنرل قمر جاوید باجوہ کو متعدد عالمی رہنماؤں کی جانب سے پہلے ہی میڈلز سے نوازا جا چکا ہے۔سعودی ولی عہد نے آرمی چیف کو 26جون 2022ء کو میڈل آف ایکسلینس سے نوازا تھا۔ بحرینی ولی عہد نے آرمی چیف کو 9جنوری 2021ء کو بحرینی آرڈر فرسٹ کلاس ایوارڈ سے نوازا تھا۔ کنگ عبداللہ دوئم نے آرمی چیف کو 5اکتوبر 2019ء کو آرڈر آف ملٹری میرٹ اردن سے نوازا تھا۔سپہ سالار جنرل قمرجاوید باجوہ کو 27 دسمبر 2018 کو ریسکیو میں مشترکہ دولت اور روسی کوہ پیمائی فیڈریشن کا تعریفی خط روسی سفیر کے دورہ پاکستان کے دوران دیا گیا۔آرمی چیف جنرل قمر جاوید باجوہ کو 20 جون 2017 میں ترکی لیجن آف میرٹ ایوارڈ انقرہ میں دیا گیاتھا۔