آرمی چیف جنرل قمر جاوید باجوہ کی زیر صدارت 247 ویں کور کمانڈرز کانفرنس ہوئی جس میں ملکی سیکیورٹی کی صورتحال بالخصوص بلوچستان میں دہشت گردی کے حالیہ واقعات پر بریفنگ دی گئی۔
آئی ایس پی آر کے مطابق کانفرنس میں بلوچستان میں دہشت گردوں کے حملے پسپا کرنے پر شہید جوانوں کو خراج عقیدت پیش کیاگیا۔
آرمی چیف جنرل قمر جاوید باجوہ نے کانفرنس سے خطاب میں کہا کہ ہم نے دہشت گردی کے خلاف جنگ میں ایک طویل سفر طے کیا ہے۔ ہم دہشت گردوں، ان کے معاونین اور ساتھیوں کی باقیات کو ختم کر کے رہیں گے ۔
کانفرنس میں آرمی چیف نے دشمن قوتوں کے عزائم ناکام بنانے کے لیے فارمیشنز کی آپریشنل تیاریوں اور حفاظتی اقدامات پر اطمینان کا اظہار کیا۔ انہوں کرتے ہوئے کہا کہ مسلح افواج نے قوم کی حمایت سے ہر رنگ و نسل کے دہشت گردوں کے خلاف کامیاب آپریشن کئے ہیں ۔ امن کی بحالی میں ان دہشت گردوں کو کامیاب نہیں ہونے دیا جائے گا۔
آئی ایس پی آر کے مطابق آرمی چیف جنرل قمرجاوید باجوہ نے تمام فارمیشنوں کو ہدایت کی کہ وہ بنیادی فوجی تربیت کے اعلیٰ معیار کو برقرار رکھنے پر توجہ مرکوز کریں ۔ تاکہ روایتی اور غیر روایتی ڈومین میں کارروائیوں کے موثر نفاذ کو یقینی بنایا جا سکے۔