وزیراعظم عمران خان کی بیجنگ میں چین کے قومی ترقی اور اصلاحاتی کمیشن کے چیئرمین سے ملاقات ہوئی ۔ ملاقات میں چین کے سیاسی ،مشاورتی کونسل کے وائس چیئرمین بھی شریک ہوئے ۔ ملاقات میں سی پیک کے جاری منصوبوں اور مستقبل کے اقدامات کا جائزہ لیا گیا۔

وزیراعظم عمران خان نے کہا کہ چین اور پاکستان آزمودہ دوست ہیں، پاکستان اور چین کی تعاون پر مبنی تذویراتی شراکت داری ہر آزمائش پر پورا اتری۔

کورونا کے باوجود دونوں ملکوں کے تعاون کے باعث سی پیک منصوبوں پر کام جاری رہا۔

وزیراعظم عمران خان نے چین کے قومی ، ترقی اور اصلاحاتی کمیشن کے تعاون کو قابل تحسین قرار دیا ۔ انہوں نے کہا کہ سی پیک،بی آرآئی منصوبے کا اہم جزو ہے،سی پیک سے دونوں ملکوں کے عوام مستفید ہو رہے ہیں۔

عمران خان کا کہنا تھا کہ سی پیک منصوبوں نے ملک میں پائیدار معاشی ترقی کی مضبوط بنیاد رکھ دی ہے ۔ سی پیک کے جلد مکمل ہونے والےل منصوبوں سے پاکستانی معیشت پر مثبت اثرات مرتب ہوئے،پاکستان اور چین گوادر کو خطے کا معاشی مرکز  بنانے کےلیے اپنی کوششیں جاری رکھیں گے۔