پٹرولیم مصنوعات مہنگی
پاکستان میں سال نو کےآغاز پر عوام پر مہنگائی کے بم گرا دیئے گئے ، نئے سال پر مہنگائی کا پہلا تحفہ پٹرولیم مصنوعات کی قیمت میں اضافہ کر کے دیا گیا ،پٹرول اور ڈیزل کی قیمت میں 4,4روپے فی لیٹر اضافہ کیا گیا ، پٹرول کی نئی قیمت 144 روپے 82 پیسے مقرر کر دی گئی۔
وزارت خزانہ کی جانب سے جاری کردہ نوٹیفکیشن کے مطابق ہائی اسپیڈ ڈیزل کی قیمت 4 روپے اضافے کے بعد 141 روپے 62 پیسے تک پہنچ گئی ، لائٹ ڈیزل 4 روپے 15 پیسے فی لیٹر مہنگا ہوا ، نئی قیمت 111 روپے 6 پیسے مقرر کردی گئی ہے۔
مٹی کے تیل کی قیمت میں 3 روپے 95 پیسے اضافہ ہوا جس کے بعد نئی قیمت 113 روپے 53 پیسے فی لٹر مقرر کی گئی ہے۔ذرائع کے مطابق پٹرول اور ڈیزل پرلیوی4,4 روپے فی لیٹر بڑھائی گئی ، پٹرول پر لیوی 17روپے 62پیسے فی لیٹر مقرر کی گئی ہے ، ڈیزل پر جی ایس ٹی 9فیصد سے کم کر کے 5.44فیصد کر دیا گیا،پٹرول پر جی ایس ٹی 4.77فیصد سے کم کرکے 2.5فیصد کر دیا گیاہے۔
سال نو کے پہلے روز سونا بھی مہنگا
سال نو کے پہلے روز ملک میں سونے کی فی تولہ قیمت میں اضافہ ہوگیا، سندھ صرافہ بازار جیولرز ایسوسی ایشن کے مطابق فی تولہ سونے کی قیمت میں 200 روپے اضافہ ہوا جس کے بعد قیمت ایک لاکھ 26 ہزار 200 روپے ہو گئی۔
دس گرام سونے کا بھاؤ 171 روپے اضافے سے 108196 روپے ہے ، عالمی صرافہ میں سونے کی قیمت 10 ڈالر اضافے سے 1830 ڈالر فی اونس ہے۔
بجلی مہنگی کرنے کی تیاریاں
مہنگائی کے بوجھ تلے دبے عوام پر 17 ارب 85 کروڑ روپے کا بوجھ ڈالنے کی ایک اور درخواست نیشنل الیکٹرک پاور ریگولیٹری اتھارٹی (نیپرا) کو دے دی گئی ہے ، درخواست بجلی کی تقسیم کارکمپنیوں کی طرف سے دی گئی جس میں رواں مالی سال کی پہلی سہ ماہی کی ایڈجسٹمنٹ کی مد میں دی گئی ہے۔
ڈسکوز نے کیپیسٹی چارجز ،ترسیلی و تقسیمی نقصانات سمیت دیگر مدوں میں یہ اضافہ مانگا ہے ، نیپرا 12جنوری کو سماعت کرے گی، کیپسٹی چارجز کی مد میں 5 ارب 74 کروڑ روپے وصول کرنے کی درخواست کی گئی ہے، ٹرانسمشن اینڈ ڈسٹری بیوشن لاسز کی مد میں 9 ارب روپے وصول کرنے کی اجازت مانگی گئی ہے۔
آئیسکو نے ایک ارب 19 کروڑ لیسکو نے 2 ارب 69 کروڑ روپے سے زائد ، فیسکو کی 2 ارب 51 کروڑ ، میپکو نے 4 ارب 22 کروڑ روپے ، پیسکو نے 2 ارب 75 کروڑ، کیسکو کی ایک ارب 86 کروڑ روپے ،ٹیسکو کی ایک ارب 36 کروڑ، گیپکو کی 43 کروڑ 60 لاکھ روپے وصول کرنے کی درخواست کی ہے۔
نیپرا نے بھی تصدیق کی ہے کہ بجلی کی تقسیم کارکمپنیوں نےکیپیسٹی چارجز، ترسیلی و تقسیمی نقصانات اور دیگر مد میں بجلی کی قیمت میں اضافہ مانگا ہے ، کمپنیوں کی درخواست پر سماعت 12جنوری کو ہوگی جس کے بعد کوئی فیصلہ کیا جائے گا۔
ملک میں مائع پٹرولیم گیس کا گھریلو سلنڈر سستا
سال نو صرف معائع پٹرولیم گیس(ایل پی جی) 5 روپے 90 پیسے کمی ہوئی ہے جس کے بعد فی کلو نئی قیمت 196روپے67 پیسے ہوگی ، آئل اینڈ گیس ریگولیٹری اتھارٹی (اوگرا) کی جانب سے ایل پی جی کے 11.8 کلوگرام کے گھریلو سلنڈر کی قیمت میں69.63 روپے کمی کی گئی ،شہریوں کو ایل پی جی کا گھریلو سلنڈر 2320 روپے 81 پیسے میں ملا۔